GUBOGLO Mihail

 Mihail Nikolaeviç Guboglo (1938-2019) – sovet hem rus istorii hem etnologu.

 Erleşmä: Çadır-Lunga kasabası.

 Mihail Nikolaeviç Guboglo duudu oktäbrinin 25-indä 1938 yılda Çadır-Lungada. 1949 yılda Mihail Nikolaeviçin aylesi Çadırın başka yaşayannarınnan kaldırıldı Kurgan bölgesinä. Orada o bitirdi orta şkolayı. 1957 yılda aylä döndü ana memleketä. 

 Hep 1957 yılda Mihail Guboglo girdi işä 6-ıncı Yapıcılık-montaj bakannıına, angısı düzärdi Çadır-Lunga et işlemä kombinatını. Ama genç Mihail istärdi aaraştırmaa istoriyayı da 1958 yılda girdi üürenmää Kişinöv devlet universitetinin istoriya fakultetinä. Burada talantlı üüreniciyi hesap aldı etnografiya üüredicisi V.K. Totrov, da teklif verdi, ki Mihailı geçirsinnär üürenmää Moskva universitetinä. 1963 yılda Mihail Nikolaeviç başardı bu üüsek kurumun istoriya fakultetini. 1967 yılında korudu kandidat disertaţiyasını “Малые тюркоязычные народы Балканского полуострова. К вопросу о происхождении гагаузов”, 1984 yılında da – doktor disertaţiyasını “Этносоциальный аспект развития национально-русского двуязычия в СССР». 1985 yılda kabletti profesor adını.

 1966 yıldan işledi Rusiya Bilim akademiyası Etnologiya hem antropologiya institutunda, 1988-2005 yıllarda oldu direktor yardımcısı. Son yıllarda RBA EAİ Milletlärarası ilişkileri aaraştırma merkezin başıydı. Rusiya Etnologlar hem antropologlar asoţiaţiya başıydı (1997-1999).

 Mihail Nikolaeviç Guboglo yazdı çok iş milletlärarası ilişkilär temasında, taa “Millet-kultura avtonomiyası” Kanonun ortak avtoruydu. “Национальные движения в СССР и постсоветском пространстве” proektin avtoruydu hem seriyanın sorumnu redaktoruydu (1991-2002 yıllarda tiparlandı 110 tom). O tiparladı 500-dän zeedä bilim işi, onnarın arasında 12 monografiya.

 Rusiya Federaţiyası şannı bilim zaametçisi (1999). 2003 yılda ona verildi ad Moldova Respublikası Bilim akademiyanın saygılı azası. 2014 yılda N.N. Mikluho-Maklay adına premiyasını kabletti. 2019 yılda bilim hem pedagogika zaametindä katkısı için, uzmannarın hazılaması için Rusiya Federaţiyası Prezidenti onu ödülledi.