SOROÇÄNU Evdokiya

 Evdokiya Stepanovna Soroçänu (duudu 1954 y.) – filologiya bilgilerindä doktor, doţent.

 Erleşmä: Valkaneş kasabası.

 Evdokiya Soroçänu, filologiya bilgilerindä doktor, Moldova devlet universiteti doţenti, Moldova Respublikası Üüretim hem aaraştırmalar ministerlii Kultura mirası institutun baş bilim zaametçisi, duudu 1954 yılda Valkaneş kasabasında. Başardı Sofiya Kliment Ohrid adına universitetini (bulgar filologiyası) hem Moldova devlet universitetini (rus filologiyası).

 1995 yılda Rusiya Bilim akademiyası Slavänovedeniye hem balkanistika institutunda korudu disertaţiyasını: «Терминология болгарской календарной обрядности в сравнении с гагаузской (на материале болгарских и гагаузских говоров Бессарабии)». Yazdı 100-dän zeedä bilim işini, angıları tiparlandılar Moldovada, Rusiyada, Bulgariyada, Türkiyada, Kazahstanda, Polşada. Katıldı çoyu halklararası konferenţiyalara bizim devlettä hem sınır aşırısında da. Avtor tiparladı iki monografiya gagauzların kalendar adetleri için gagauz, rus hem rumın dillerindä, hem dä gagauz dilinin lingvistika terminnär sözlüklerini. Burada terminnär verili yaraştırmakta rus, rumın hem bulgar dillerindä terminnärlän.