KRİSTOVA Aleksandra

 Aleksandra  Afanasyevna  Kristova (Yularcı) (duudu 1961 y.) – gagauz yazıcısı.

 Erleşmä: Kongazçık küüyü.

 Aleksandra Afanasyevna Kristova duudu aprilin 17-dä 1961 yılda Avdarma küüyündä. 1978-ci yılda başardı Avdarma orta şkolasını, 1982-ci yılda – Kişinöv  İon Kränga adına Devlet Pedagogika institutunu. 1982 yıldan buyanı yaşêêr Kongazçık küüyündä, çalışêr Kongazçık gimnaziyasında. Evli, var üç uşaa: iki kızı hem bir oolu.  Ana dili hem rus dili proza hem şiir yazıcısı büüklerä hem küçüklerä deyni, dener kendini drama janrasında hem çevirilerdä, yazêr esse, toplêêr halk yaratmalarını. Tiparlanmaa başladı 2014 yılda “Hakikatın sesi” gazetasında. Gagauz Yazıcıların Birliinä girer. Yaratmaları tiparlanêr gazetalarda, jurnallarda, kiyat toplumnarında, uşaklar için kiyatlarda. 

 1918 yılda çıkardı ilk kiyadını “Cıvırlıga türküsü”. Hep o yılda Gagauz yazıcıların proza hem şiir konkursunda kiyadı 1-ci eri.

 2016 yılda katıldı “Meras” cümnä toplumun yaraşmasına da aldı ilk eri.  2017  hem 2020 yıllarda oldu halklarasında Puşkin konkursunun laureatı rus dili üüredicisi olarak. 2019 yılda taradı üüredici konkursunda “En ii Ana dili uuredicisi – 2019”.  2021 - ci yılda “Gagauziyanın Saygılı Üüredicisi” ödülünü aldı.

 2021 -cidä tiparlandı ikinci kiyadı “Lüzgerä karşı”, angısında girdi peet, annatma, folklor,  adetçä gagauz imeklär için annatmalar, uşaklar için yartamalar, zamandaş komediyalar. Yaratmalarında yazdırêr büünkü hem evelki Bucaa, adetleri, dini, Vatan naturasını, küçüklüünü, gagauz yaşamasını, gagauzluu, türlü iç duygularını, yaşamak için filosofiya düşünmeklerini.