ARNAUT Fedora

 Fedora İvanovna Arnaut (duudu 1970 y.) – gagauz yazıcısı, bilimci.

 Erleşmä: Dimitrovka küüyü.

 Fedora Arnaut duudu 1970 yılda Ukraina Bolgrad dolayı (büünkü gündä Odesa dolayı) Dimitrovka küüyündä çiftçi aylesindä. 

 Başlakı hem orta üüretimini başardı Dimitrovka küüyündä. Bir yıl işledi Çadır kasabasının Kultura merkezindä. Moldova-Azerbaycan üüretim annaşmasına görä o girdi üürenmää bücettä Baku Mehmet Emin Resulzade devlet universitetinä filologiya fakultetinä. Azerbaycana üüretimä gidän ilk gagauzun biriydi.

 1993 yılda o başardı universiteti da gitti Türkiyaya. Ankara Gazi universitetindä bitirdi doktoranturayı.

 Fedora Arnaut işledi halklararası Kiev Gün duusu-Ak deniz universitetinin türk dili hem literatura fakultetindä; dersleri götürdü Taras Şevçenko adına Kiev Millet universitetinin türkologiya kafedrasında. 2008-2013 yıllarda Ukraina gagauzlar birliin başıydı. 

 2005 yılda ona verildi KIBATEK ödülü, 2009 yılda - “Gagauziyanın 15-inci yıldönümü” medalisi, 2013 yılda – Türk Halk Kultura izmet ödülü 2015 yılda da Taras Şevçenko yaratmalarını türk hem gagauz dillerinä çevirileri için verildi Panteleymon Kuliş medalisi. O çevirdi gagauz dilinä Ukraina gimnasını.

 Fedora İvanovnanın şiirleri getirdilär eni bir dalga gagauz literaturasına. Kabledip üüretimi türk dünnäsında, o getirdi eni soyları da. Kendi yaratmalarında avtor kullandı gagauz halkının millet hem filosofiya özelliklerini.