BABOGLU Nikolay

 Nikolay İgnatyeviç Baboglu (1928-2008) – gagauz yazıcısı, poet, folklorcu, gagauz dili üürenmäk kiyatların avtorların birisi, çevirici, publiţist.

 Erleşmä: Kıpçak küüyü.

 Nikolay Baboglu duudu may ayın 2-sindä 1928 yılda Taraklı (şindi Çadır) dolayın Tatar-Kıpçak küüyündä çiftçi aylesindä. Ayledä vardı beş uşak – iki kız hem üç çocuk. 

 1940-ıncı yılda bitirdi şkolayı ana küüyündä. 1941-inci yılda güzün onu yazdırdılar İzmail kasabasının klisä şkolasına. O zamannar gagauz uşaklarını bölä kurumnara üürenmeyä almazdılar. Onuştan onun bobası hem popaz yazdırdılar onu rumın.

 İkinci Dünnä Cengi başladıktan sora İzmail şkolası kapandı, da Nikolay Baboglu döndü kendi küüyünä. Burada onu teklif ettilär küü şkolasına işlemää üüredici. 1944-1950 yıllarda o işlärdi hem paralel üürenärdi Kaul pedagogika uçilişçesindä (zaoçno), sora da Kişinöv devlet universitetindä moldovan dili fakultetindä.

 Bütün yaşamasında N.Baboglu işledi hem üüredici, hem zavuç, hem şkola direktoru. Herzaman da o yazardı. 

 50-inci yılların sonunda tiparlanȇrlar Baboglunun ilk literatura işleri. Çok yıl o aaraştırdı aazdan halk yaradıcılıın temel janralarını ana küüyündä.