ÇAKİR Mihail

 Mihail Mihayloviç Çakir (1861-1938) – gagauz hem moldovan din adamı hem aydınnadıcısı.

 Erleşmä: Çadır-Lunga kasabası.

 Mihail Mihayloviç Çakir duudu aprilin 27-sindä 1861 yılda Çadır-Lunga küüyündä dyak aylesindä. Fedi küçük kardaşınnan bitirdi Kişinöv ruh seminariyasını. Üüredicilik etti Kişinöv adam ruh uçilişçesindä. Üç yıldan sora seçildi Halk üüretim ministerlii Kişinöv uçilişçe nasaatına.

 1896 yılda Mihail Çakir danıştı Rus imperiyası Halk üüretim ministerliinä, ki izin versinnär tiparlamaa kiyatları moldovan dilindä. İzini verip, ona konuldu şart, ki moldovan teksti erleştirilsin paralel rus dilinnän. 1901 yıldan Çakir tiparlȇȇr kiyatları “Bukovina”, “Kısa moldovan gramatikası”, “Gramatikadan bilgilärlän rus dilindä üüretici”. Kiyat “Rus dilini üürenmeyä başlayan moldovana yardımcı” tiparlandı 3 kerä 14 yılın içindä.

 1904 yılda Mihail Çakir danıştı Sinoda gagauz dilindä din literaturasını tiparlamaa izin için. İzini kabletti da artık 1907 yılda çıkardı Eski Baalantı paylarını, Evangeliyayı hem Evangeliyayı Matfeydän, angılarını çevirdi gagauz dilinä kendi.

 1918 yıldan sora, açan Besarabiya girdi Rumın krallıına, Mihail Çakir başlattı gagauz dilinin uydurmasını latik grafikasına. 1924 yılda o girdi Besarabiyada rumınizaţiyaylan savaşmayı uygunnaştıran Aleksandr-Nevskiy kardaşlıın öndercileri arasına.

 1934 yılda tipardan çıktı Çakirin kiyadı gagauz dilindä “Besarabiyalı gagauzların istoriyası”, neredä o tamannadı etnograf işini. Mihail Çakir hazırlayan Gagauz-rumın sözlüü dä çıktı 1938 yılda.

 Geçindi protoierey Mihail Çakir hastalıktan 1938 yılda.