Proekt için
Proekt “Gagauz literatura kartası”
Artistik süretlerin yardımınnan literatura tanȇr hem birleştirer dünneyi. O aaraştırȇr cümnä hem individual ilerlemenin akışlarını. Literatura yaratması okuyucuya olȇr üürenmäk ortamı, bilgi kaynaa yaşamanın situaţiyaları için, angılarınnan o karşılaşȇr. Literatura genişleder okuyucunun dünnäsını, açȇr sınırsız kolaylıkları kabletmää bilgi, angıları ayırlanȇrlar bilim kolaylıklarından.
Proekt “Gagauz literatura kartası” – o kompleksli soţial-kultura proekti, angısını başlattı Gagauziya M.V. Maruneviç adına Bilim-aaraştırma merkezi. Kurulu proekt zamandaş informaţiya tehnologiyaların kullanmasında. Karta olacek bir kolaylık meraklandırmaa insannarı okumaya, kulturaya hem gagauzların literatura mirasına. Proektin kurulması yardım eder kolay kabletmää informaţiyayı devamnı zeedelenän elektron kaynaandan.
Proekt doorudulu türlü kategoriya insannarın ruh, kultura hem intelektual gelişiminä.
Bilgi kaynaan İnternettä erleştirilmesi verecek kolaylık hepsi isteyennerä katılmaa gagauz halkının ruh kıymetlerinä, nekadar uzakta onnar bulunmasalar da.
Proektin neeti:
ilerletmää literatura alanını, kurup sayfayı, neredä toplu informaţiya Gagauziya ATB-nin literatura yaşaması için hem gagauz halkının temsilcileri için literatura uurunda sınır aşırısında, angısı verecek kolaylık birleştirmää hepsi literatura kuvetlerini hem bildirmää cümneyä yaradıcılık hem literatura potenţialını.
Proektin daavaları:
- toplamaa nekadar çok informaţiya gagauzların zamandaş literatura yaşaması için hem tanıtmaa onu sayfanın yardımınnan: yazıcılar hem poetlär, birliklär, literatura jurnalları;
- vermää meraklı okuyuculara hem avtorlara lääzımnı informaţiyayı bu temada;
- ilerletmää okumayı hem literatura alanını cümnä uurunda lääzımnı hem kultura-aydınnadıcı sıraların yardımınnan;
- vermää informaţiyayı, angısı meraklandırȇr istoriyaya hem kulturaya, hem dä açıklȇȇr halkımızın literatura mirasını.
Auditoriya:
Proekt interesli olacek çoyuna: avtorlara hem okuyuculara, üüredicilerä, studentlerä, üürenicilerä, hem hepsinä, kim meraklanȇr ana tarafının istoriyasınnan hem literatura yaşamasınnan.
Proektin aktuallıı onda, ani o verer kolaylık literatura birliklerinä hem başka kurumnara hızlı bildirmää informaţiyayı kendi zaameti için auditoriyaya da çekmää onu kendi proektlerinä.
Bucaan (Gagauz tarafın) var zengin istoriya-literatura geçmişi hem şindiki vakıdı. Bizim topraamızlan baalı çoyu anılmış yazıcıların hem poetlerin eceli, angıları çok etkiledilär gagauz literaturasının ilerlemesini: o Nikolay hem Dionis Tanasoglu, Nikolay Arabacı, Stepan Kuroglu, Nikolay Baboglu, Mina Kösä, Dmitriy Karaçoban hem başkaları. Kimileri duudu gagauz topraanda, kimileri büüdü da yaşȇȇr burada, kimilerini sä ecel getirdi bizim taraflara.
Saytın temelini kurȇr informaţiya sayfaları bilgilärlän gagauz yazıcıları, bilimcileri, cümnä zaametçileri için, angıları yaşȇȇrlar hem yaşadılar diil sade avtonomiya topraklarında, ama başka devletlerdä dä.
Kaynaan Baş sayfası – o Moldovanın geografiya kartası, neredä nışannanȇȇrlar kasabalar hem küülär. Seçtiynän erleşmeyi, peydalanȇr bu erlärlän baalı yazıcıların adları.
Kartanın var butakım bölümneri: «Yazıcılar», «Basımnar», «İnformaţiya», «Gagauziya yazıcılar birlii», «Kontaktlar».
«Yazıcılar» bölümündä var alt bölümnär «Yazıcılar», «Cümnä zaametçileri», «Gagauziya Yazıcılar Birlii». Onda alfabet sıralıına görä erleştirili yazıcıların, bilimcilerin adları. Herbir avtor için verili biografiya kısadan, onun fotosu hem yaratmaları.
«Basımnara» girer alt bölümnär: «Gazetalar», «Kiyatlar gagauz dilindä», «Kiyatlar rus dilindä», «Kiyatlar gagauz hem rus dilindä», «Jurnallar», «Toplumnar». Orada avtorlar adların alfabet sıralıına görä erleştirili tiparlı işleri, toplumnar, verili bilgilär Gagauziyada önemni olan jurlanallar hem gazetalar için, onnarın kimi nomerleri.
Bölüm «İnformaţiya» pay olȇr «Haberlär», «Literatura ödülleri», «Geografiya dizini». İlk bölümdä açıklanȇr türlü eni haberlär, ikincisindä annadılȇr Literatura ödülleri için. Üçüncüsündä var nicä işlemää kartaylan, seçip erleşmeyi, var nicä görmää bu erlärlän baalı avtorların adlarını.
Bölümdä «Gagauziya yazıcılar birlii» veriler informaţiya Birlik için, onun Ustavı, hem dä haberlär Birliin azaları için.
Bu proektin yok son noktası, neçinki o bulunȇr devamnı zeedelenän durumunda: peydalanȇr eni talantlar, her yıl yazıcılar kablederlär nesoysa ödülleri. Büün kaynakta var diil sade profesional avtorların adları, ama onnarın da, kim zanaatlanȇr literatura yaradıcılıınnan, tiparlandı jurnallarda, kolektiv toplumnarında ya da ayırı kiyatlarda.
«Gagauz literatura kartası» yardımcı olȇr oluşturmaa kulturayı, nicä kullanmaa elektron kaynaklarını, genişleder bibliotekaların, arhivlerin, muzeylerin, üüretim kurumnarın kolaylıklarını.
Biz umutlanȇrız, ani karta kaldıracek eni uura interesi bölgenin literatura kulturasına, çekecek dikkatı aaz incelenmiş temalara hem hızlandıracek literatura turizmanın gelişmesini.
Proekt doorudulu insannarın ruh, kultura hem intelektual gelişmesinä
