Title

«Gagauz literatura kartası» proektinin ayırılmaz payı – literatura konkurslarının materialları hem sonuçları.

2018 yılın avgustun 1-indän dekabrinin 1-inädän Gagauziyada geçti peetçilär hem prozaiklär yıllık bölgä literatura konkursu «Lääzımnı kiyat – 2018». Konkursu hazırladı hem geçirdi Gagauziya yazıcılar birlii.

Jüriyä girdi literatura birliklär temsilcileri, anılmış gagauz poetleri hem yazıcıları, literaturacılar hem baamsız ekspertlär.

Konkursun neetleri:

- halka tanıtmaa gagauz dilini;

- terbietmää dolay gerçeklerinin estetika annamasını;

- özendirmää literaturaylan zanaatlanmayı;

- oluşturmaa cümnedä moral-ţivil pozițiyalarını;

- yaygınnamaa gagauz yazıcılarının hem peetçilerinin artistik mirasını;

- desteklemää hem geliştirmää büüyän evlat boylarında literatura becermeklerini;

- oluşturmaa meraklık Gagauziya yaşamasına hem insan ecellerinä.

Konkursun daavaları: literatura uurunda kurmaa koşulları yaradıcılık potenţialını gerçekleştirmää deyni, aaramaa talantlı katılannarı hem yardımcı olmaa onnara yaradıcılık gelişmesindä.

Konkursa kendi işlerini teklif ettilär hem Gagauziya yaşayannarı, hem dä hepsi isteyennär, hesaba almayarak yaşı, soyu hem zanaatı.

Konkurs geçirildi iki nominaţiyayada: poeziya (küçüklerä hem büüklerä artistik literatura gagauz dilindä) hem proza (dokumental, publiţistik hem anmak literaturası gagauz hem rus dilindä).

Pay alannar teklif ettilär kendi yaradıcılık işlerini gagauz avtonomiyası için hem ana tarafın gözellii için, insan ecelleri için, onnarın başarıları hem ruh zenginnii için.

Konkursta bakıldı tiparlı avtor kiyatları 2008 yıldan 2018 yıladan.

Konkursta pay alan hem ödülleri kazanan en gözäl yaratmalar girdilär bu proektä. Onnar mutlak zenginnedeceklär avtonomiyanın artistik kulturasını, üüseldeceklär gagauz literaturanın soţial önemini, çekeceklär ona okuyucuların hem cümnenin dikkatını.